Friday, August 4, 2017

521. " අපෙ හාමුදුරුවනේ ඔය කරා ඇළ කියන එක...."


හම්බන්තොට පිහිටි මරා (හිජකුපාම-නීලකාස) 

වරාය ගුවනින් දිස්වන අන්දම දැක්වෙන 
සිතුවමක් ඉහත දැක්වේ.

මාගම්පුර වරාය නොහොත් කවුරුත් දන්නා විදිහට හම්බන්තොට වරාය චීන සමාගමකට බදු දුන්න පහුගිය සෙනසුරාද. 

පහුගිය ටිකේම මේ ගැන බොහොම ලොකුවට හාහෝවක් ගියා වැඩිපුරම ෆේස් බුක් එකේ. දැං මේ දවස්වල බයියො වැඩිපුරම වැඩ දාන්නෙ ෆේස්භුක් එකේ. ඇයි ඉතිං කාගෙං තහනමක්ද? බහුතරයක් මේ පස්ස කහ ගන්ට නියපොත්ත නැති එව්වො. අම්ම තාත්ත හම්බකරල දෙන දෙයකිනුයි ජීවිතේ ගැටගහගන්නෙ. 

ඒත් බලන්ට එපාය පේස් භුක් එකට ගියාම. අප්පට සෝරු....ඊට වැඩිය දේශ ප්‍රේමියෙක් නෑ. රටද ජාතියද ආගමද ඒ තුන රැකගන්ට දිවි හිමියෙන් සටන් වදින්නෙ. ආය නෑ රට වෙනුවෙන් මැරෙන එක නිකං මේ කිඹුහුමක් යන ගානට ඒ මහා වීරයො සලකන්නෙ.

මගෙ පළමෝත අත්දැකීමක් (Firsthand experience) කිව්වොත් ඔන්න ටික දවසකට ඉස්සර මගෙ හොඳම යාලුවෙක් කතා කලා......

"අනේ මචං බලපංකො වීරෙ...(ඌ තාම මට කියන්නෙ වීරෙ කියල) කොලුවගෙ නම් ඔලුව නරක් වෙලා ද කොහෙද බං....මම මාර අප්සෙට් එකේ ඉන්නෙ ඌ ගැන"

ඔහොම කිව්ව මගෙ යාලුව.....කොලුව කිව්වෙ උගෙ පුතාට ..එකම පුතා....කෙල්ලො දෙන්න වැඩිමල් ඊලඟට ඔය පුතා....මමත් ජංගිය උස්ස උස්ස දුවන කාලෙ ඉඳල කොලුවව දන්නව.

බන්දුලයගෙ (බන්දුලය කිව්වෙ මගෙ යාළුව) ගෙවල් ගම්පොළට පොඩ්ඩක් මෙහා. ඒ හරියට කියන්නෙ වැලිගල්ල. කාලයක් තිබ්බ මම සතියකට සැරයක් වගෙ එහෙ ගිහිල්ල සෙට් වෙනව. ඒ කාලෙ මට මතකයි ඔය පොඩි එකා ප්ලාස්ටික් පිඟානක් අරගෙන අපි ගාවට ඇවිල්ල සීරුවෙන් හිටගෙන ඉන්නව බයිට් එකෙන් මොනවහරි උගෙ පිඟානට දානකල්. 

බන්දුලය ඔය මොනවහරි ටිකක් දාල ඌව පන්නගන්නව. "යන්න යන්න මෙතන ඉන්න එපා..ආයෙම ආවට දෙන්නෙත් නෑ..ඔච්චර තමයි ඔන්න...." 

කොල්ල කොහෙද ඒ කියන එව්ව අහන්නෙ. ආයම එනව විනාඩි දහයක් යන්ට කලිං..

"මම කිව්ව නේද එක පාරක්... " බන්දුලය ඌට සැර වෙනව..

"අනේ පව්නෙ බං….. ආ එන්න පුතා.." 

මම කොල්ලගෙ පිඟානට කඩල අහුරක් දානව. මට ඔව්ව පුරුදුයි. මයෙ පොඩි නංගිගෙ ලොකු කොල්ලත් ඒ කාලෙ ඔහොම්මමයි. මේ පාර ඒකා පේරාදෙණියට තේරිල. මට යුනිවසිටි යන්ට බැරිවුන එකේ කොල්ල තේරිච්ච එක ම අප්‍රමාණ තන්තෝසයි.

ඉතිං බන්දුලය මට කතා කරල කිව්වෙ මෙහෙමයි. 

"මචං මේක අහපංකො..මාර සීන් එකනෙ වෙලා තියෙන්නෙ..අපේ සඳුන් (සඳුන් කිව්වෙ උගෙ පුතණ්ඩිය)…"

"ඉතිං මොකෝ බං සඳුන්ට?..."

"උඹ දන්නවනෙ මම ඕකට මොනතරම් වියදම් කලාද කියල.."

ඔය බන්දුලයගෙ පුතා ඒ ලෙවල් යම්තමට පාස් වුනේ. ඊට පස්සෙ බන්දුලය සෑහෙන වියදමක් කරල කොල්ලව අයි.සී.එම්.ඒ. ද කොහෙද ක්ලාස් යවල විභාගෙ පාස් කෙරෙව්ව. මම ඔය සීන් එක දන්නව. මොකද කොල්ලට සල්ලි හදිස්සි උනහම ඌ මගෙනුත් ලෝන් එහෙම ගහනව. හැබැයි අපරාදෙ කියන්න බෑ හැකි විගස ආපහු දෙනව.

"ඔව්..ඔව්..බං මම දන්නව. කොල්ල දැං අර විභාගෙ එහෙමත් පාස් නේද?"

"පාස් නම් තමයි.. ඒත් බලපංකො බං මූ කිසිම කිසි උනන්දුවක් නෑනෙ කීයක් හරි හම්බ කරගන්ටවත්.."

"ඈ ඒ මොකද?"

"හිටපංකො කියන්න. මම දන්නෙ නෑ උඹ මේ කතාව විස්වාස කරයිද කියලවත්.."

"මොකක්ද? "

"කොල්ල දැං ෆුල් ටයිම් බැහැල වැඩ  මහින්දගෙ අර මොකක්ද පක්සෙට.."

"අර මොන පොට්ටුවක්ද මොකක්ද කියන එකට? "

"ඔව් බං අර මහින්ද ආපහු බලයට ගේන්ට දත මැදගෙන ඉන්න ව්‍යාපාරයක් තියෙන්නෙ..අන්න ඒකට…"

"හුටා ……"

"ඒකනෙ කියන්නෙ...ඒ විතරක් නම් මදැයි..මූ රස්සාවක් කරන්නෙත් නෑ..රස්සාවක් හොයාගන්ට උනන්දුවකුත් නෑ. සම්පූර්ණ දවසෙම කරන්නෙ කාමරේට වෙලා ෆේස් බුක් එකේ මහින්දව ප්‍රමෝට් කරන එක..ඉඳපන්කො මම උඹට උගෙ ඔය පේජ් එකේ ලින්ක් එක එවන්නම්කො."

ඒ කිව්වත් වගේම බන්දුලය මට ඒ ලින්ක් එක එවල තිබ්බ. මම කොල්ලගෙ පේජ් එකට ගිහිල්ල බැලුව. දෙයියෝ සාක්කි. මූ තනිකරම ඉතාම උග්‍ර මහින්ද වාදියෙක් වෙලානෙ. අපෙ හුප්පච්චී කියල මරා අර අත්දෙකත් උස්සගෙන බුරුසුව පුම්බගෙන ඉන්න ෆොටෝ එකකුත් ප්‍රොෆයිල් එකට දාගෙන...හෙහ්..හෙහ්..පිස්සු පීකුදු...

දවසම වැඩේ කාමරේට වෙලා ෆේස් බුක් එකේ කිව්වම මම ඊයෙ පෙරේද ඒත් වත්පොතේම දැක්ක ආතල් පෝස්ට් දෙකක් මතක් වුනා. මොකා මෙව්ව හදනවද මන්ද...හෙහ්,හෙහ්.. 

එකක් මෙහෙමයි.."ඊයෙ හවස හදිස්සියෙම ඩේටා ඉවරවෙලා මම කාමරෙං එළියට බැහැල අම්මයි තාත්තයි එක්ක ටිකක් කතා කලා..ෂහ්..ඒ දෙන්න හරි හොඳ දෙන්නෙක්නෙ...."

දෙක මෙහෙමයි.."යකෝ මේක හරි කෙළියක්නෙ..ටිකක් හුළං වදින්ට කියල මිදුලට බැස්ස කියහංකො..අහල පහල එවුං අහනව ඇයි ඩේටා ඉවරද? කියල. හුහ්.. "

ඉතිං මම මේ කියන්ට ආවෙ ඔය බයියො ඔහොම්මයි. හිජකුපාම නීලකාස වනාහී හොර බොරු වංචා කිසි දෙයක් නොකරපු නෙලුම් මලෙන් බිහිවූ සිදුහත් කුමාරයා හා සමාන කෙනෙක් කියලයි ඔය බයියො සීයට අනූනමයයි දසම නමයයි නමයක්ම විස්වාස කරන්නෙ. ඒකට මේ ඔය උගත් කම කියන එකේ කිසිම වැදගත් කමක් නෑ. කැම්පස් ගිහිල්ල උපාධිය ගත්තු බයියයි ඉස්කෝලෙක පැත්ත පලාතක නොගිහිං මුට්ට කරගහන බයියයි අතරෙ එතන කිසිම වෙනසක් නෑ. දෙන්නම එකයි.

අහ්හ්..කොහොමද හිජකුපාම-නීලකාස කිව්වම හෙණ ගතියක් තියනව නේද? අර ෂුද්දගෙ කාලෙ දුන්නු නම්බුනාම වගේ නේ? ඕ.බී.ඊ. එතකොට එම්.බී.ඊ.. එහෙමත් නැත්නම් කේ.සී.බී.ඊ.. වගේ එව්ව..

ආ..තව එකක් කියන්ට ඕන..පහුගිය දවස්වල බයියො බොහොම විස්සෝපෙං කතා කරනව මම දැක්ක ක්‍රා ඇළ ගැන. මෙහෙමයිලු. තායිලන්තෙ හරහ ඔය කියන ඇළ කැපුනම සිංගප්පූරු වරාය පල්ලෙහට වැටිල හම්බන්තොට වරාය (ආ..හම්බන්තොට වරාය නෙමෙයි හැබැයි ඒකෙ නිල නාමය..මහින්ද රාජපක්ෂ හිජකුපාම නීලකාස වරාය) උඩට එනවය. එහෙම තියෙද්දි චීනෙට වරාය බදුදීල ආණ්ඩුව මහ මෝඩ කමක්ය කරගත්තෙ. මෙච්චර වියදමක් කරල හිජකුපාම නිල කාසය මේ වරාය කලේ ටක්කෙටම ඔය ක්‍රා ඇළ හාරන එක ගැන හිතලය අරකය මේකය රටේ නැති එව්ව...

ඒ ඔක්කොම පට්ටපල් බොරු ..හෙහ්..හෙහ්..ඇත්තම කතාව කිව්වොත් ඔය ක්‍රා ඇළක් ගැන හිජකුපාම අඳෝ සංසාරයක් දන්නෙ නෑ. 

ඔය හිජකුපාම එකල්හි ප්‍රොජෙක්ට් එකක් පටන් ගන්න  කලින් සළකා බැලුවෙ කරුණු කාරණා හතරක් විතරයි. 

1. මේ ප්‍රොජෙක්ට් එකෙං මම සහ මගේ පවුලට තියන වාසි මොනවද?

2. මේකෙං මගේ හීන මානය සමනය කරගන්ට මොනවද කරන්ට පුලුවං? 

3. මගෙ ලොකු කොල්ල නාමෝලා ඊලඟට රජ කරවන්ට මේකෙං ප්‍රයෝජනයක් ගන්ට ඇහැක්ද?

4. මගෙ හෙන්චයියන්ට ඒ කිව්වෙ මගේ සදාදරණීය බයියංට මේකෙං කීය කීය හරි හොයාගන්ට චාන්ස් එකක් අරං දෙන්ට ඇහැක්ද?

අන්න එච්චරයි...රටට භෙණ ගැහුවත් කමක් නෑ...පොඩ්ඩක් ඔය හීනමානෙ ගැන හිතල බලන්ට මම කියන්නෙ බොරුද කියල? නෙලුම් පොකුණ මරා රඟහල, මරා එයාපෝට් එක, මරා වරාය...හතර විලි ලැජ්ජාවෙං දසමයක් හරි ගෑවිලවත් තියන මනුස්සයෙකුට පුලුවන්ද රටේ මිනිස්සුන්ගෙ බදු මුදලින් ගෙවන්ට ගිණි පොළියට ගත්තු ණයෙං හදපු එව්වට කිසි හිරිකිතයක් නැතුව තමංගෙ නම දාගන්ට?

ඔතන දැං ඔය බයියො රෙදි කරට අරගෙන ක්‍රා ඇළේ කතන්දරේ කියන කොට මට මතක් වුනා සෝක් කතාවක්.

මේක මේ අමරිකාවෙ වයිල්ඩ් වෙස්ට් ඩේස් කාලෙ කතාවක්. වයිල්ඩ් වෙස්ට් ඩේස් කියන්නෙ එක්දාස් අටසිය තිහ හතලිහ වගෙ ඉඳල අසූව අනූව වගෙ වෙනකල් කාලෙ. ක්ලින්ට් ඊස්ට්වුඩ්ගෙ අර සුප්‍රසිද්ධ චිත්‍රපට මාලාව හදල තියෙන්නෙ ඒ කාලෙ පසුබිම් කරගෙන. The good, the bad and the ugly, Fistful of dollars , For a few dollars more....

ඔන්න ඒ කාලෙ එක නගරයකට එනවලු මැරවරයො තුන් හතර දෙනෙක්. මේ ගොල්ල හොඳ වෙඩික්කාරයො. මෙයාල එන්නෙ නගරයෙ බැංකුව මංකොල්ල කන්න. හැබැයි නගරයට ආපු ගමං මේ මිනිස්සු දකිනව නගරයෙ ගෙවල්වල බිත්තිවල වැටවල් වල එතකොට ගස් වල කඳන්වල හැමතැනම වෙඩි පාරවල්. ඒ හැම වෙඩි පාරක්ම වැදිල තියෙන්නෙ සුදු හුණු කූරකින් ඇඳපු රවුමක හරියටම මැද්දෑවෙ.

"ෂෙහ්, පුදුම දක්ෂයෙක් වෙන්ට එපාය මෙහෙම වෙඩි තියන්ට. හැම වෙඩිල්ලක්ම බුල්ස් අයි" මැරවරයො එහෙම කතා වෙලා ඒ ලඟ බංකුවක ඉඳගෙන ඉන්න වයසක මනුස්සයෙක්ගෙන් මෙහෙම අහනව.

"ලොක්කා කවුද මේ තරං දක්ස වෙඩික්කාරය මේ නගරෙ ඉන්න?" 

වයසක මනුස්සය කියනව.."ආ ඔය අර ක්‍රේසි විලීගෙ වැඩනෙ. ඔය මහත්තුරු ඕක ගණංගන්ට එපා. මිනිහ ඔය ඩෝප් වැඩි උනහම කරන්නෙම ඕක තමයි"

මේක අහල මැරවරයින්ට හීං දාඩිය දානව. 

"යකෝ සාක්කි ටවුමෙ පිස්ස ඩෝප් වැඩිඋනහම මෙහෙම වෙඩි තියනවනං අනික් මිනිස්සු ගැන මොන කතාද? යමල්ල යමල්ල යන්ට බැංකු කොල්ල කන්ට ගිහිල්ල නිකං වෙඩි කන්නෙ නැතුව.." 

එන්න එහෙම කතාවෙලා මැරවරො පස්ස නොබල පලා යනව දූවිලි අවුස්සගෙන..ආ..දූවිලි අවුස්සගෙන කිව්වෙ ඒ කාලෙ ගන්ෆයිටර්ස්ල ගමන් බිමන් ගියේ අස්සයො පිටේ. කාර් බාර් තිබ්බෙ නෑ එතකොට... කෝච්චිනම් තිබ්බ.

ඔන්න චුට්ටකිං විලියා එනව බාර් එකෙං එලියට. නකතං වෙන්ට ගහල..

"ආ විලී ෂෙහ් තමුසෙ තව විනාඩි පහකට කලිං ආව නම් මරු. තමුසෙගෙ ෂූටිං දැකල පැහැදිච්චි තුන් හතර දෙනෙක් තමුසෙ ගැන මගෙං ඇහුව...හෙහ්,හෙහ් හෙහ්.."

"අනේ උංට බම්බු ගහගන්ට කියාපං.."

එහෙම කියල විලිය ගන් බෙල්ට් එකේ තිබ්බ පිස්තෝලෙ ඇදල අරගෙන හතර අතටම වෙඩි තියනව. වැටවල්, ගස් , ගෙවල්වල බිත්ති යනාදී ඔක්කෝටම දකින දකින දේට ඔහේ වෙඩි තියාගෙන ගියා... ඊට පස්සෙ පිස්තෝලෙ කටට එහෙම පිඹල ආයම ගන් බෙල්ට් එකේ දාගත්ත.

ඊට පස්සෙ සාක්කුවෙං සුදු හුණු කෑල්ලක් අරගෙන අර වෙඩි පාරවල් ඔක්කොම වටේට රවුමක් අඳිනව. ඊගාවට අර වයසක උන්දැ ගාවට ගිහිල්ල මහ හයියෙං හිනාවෙනව...

හිජකුපාමගෙ බයියො සෙට් එකත් ඔන්න ඔය පිස්සු විලී වගේම තමයි. 

අනික ඔය ක්‍රා ඇළ ගැන හිජකුපාමයා දැනගෙන හිටියනං අනිවා මේ වෙනකොට ඉස්ටේජ් එහෙකදි  මෙහෙම කියල..

"අනේ අපෙ හාමුදුරුවනේ..බලන්නකො මම හදපුව ඔක්කොම මේ ආණ්ඩුව එකින් එක විකුණනව. දැං ඔය හම්බන්තොට වරාය ගැන බලමු. ඕකෙං පාඩුයි පාඩුයි කියල කෑගැහුවට මම ඕක හැදුවෙ අර කරා ඇළ ගැන හිතල...අනාගතයෙ අන්න ඒ ඇළ හැදුවම ඕකෙං හම්බවෙන සල්ලි වලිං අපිට පුලුවනි................"

15 comments:

  1. රවී ලොක්කා හැබෑට මොකද්ද ඔහේට ඔච්චර හිජකුපාමමරා (මේ acronym එක මරු අප්පා) එක්ක තියෙන ආරෝව හිටං? මේ කොහෙවත් ඉන්න බුරුසුවෝ ගැන ලියන්නේ නැතුව, සිකුරාදා දවසේ නිවාඩු පාඩුවේ හීනියට මොනවා හරි කරගෙන නරකද පරණ කතාවක් ලියුවානම් එහෙම?

    ReplyDelete
    Replies
    1. Udaya,

      /රවී ලොක්කා හැබෑට මොකද්ද ඔහේට ඔච්චර හිජකුපාමමරා (මේ acronym එක මරු අප්පා) එක්ක තියෙන ආරෝව හිටං?/

      මොන ආරෝවක්ද බං? මරාගෙ මුලු පවුලටම මං බොක්කටත් පහලිං ඉඳල ආදරෙයි. ඇහුව නේද මංගල මේ ඊයෙ පෙරේද පාර්ලිමේන්තුවෙ කරපු කතාව?

      සිරංති (ද්විත්ව හැඳුනුම්පත්ධාරී) ලොකු මැඩං ඩේසි ආච්චිත් එක්ක පැරිසියෙ ගිහිල්ල දාපු සෙල්ලං? (ඔව්වට ඉංගිරිසියෙං කියන්නෙ Paint the town red කියල..හෙහ්,හෙහ්) ඉතිං ඔය විස්තර එලිං එක එලියට එනකොට මරා පවුල කෙරෙහි ඇති මගේ බක්තිය සහ ගහුරවාදරය තව වැඩිවෙනව (Increasing in leaps and bounds)

      අරෝව කිව්වම මතක් වුනේ බදුල්ලෙ ටවුම කිට්ටුව තියනව පිංඅරාව කියල ගමක්. එක පාරක් ඔය පිං අරාවෙ මගෙ පොඩි ආතල් එකක් තිබ්බ. ඒ ගැන ඊලඟට ලියන්නං... මතක් කලාට ස්තූතියි..:)

      අර නේවි එකෙං දොට්ට දාපු වළහැඩියනං දන්නව ඇති පිංඅරාව ගැන ෂුවර් ඇන්ඩ් ෂොට්..

      /සිකුරාදා දවසේ නිවාඩු පාඩුවේ හීනියට මොනවා හරි කරගෙන නරකද පරණ කතාවක් ලියුවානම් එහෙම?/

      හීනියට කර්මාන්තයක් කරන ගමං තමයි මේ ..හෙහ්...හෙහ්...

      ඒක නෙවෙයි බං මාර කෙලියනෙ ...කාලෙකට පස්සෙ ඊයෙ වොඩ්කා ගැහුව. පශ්චාත් භාගයට කොන්ක්‍රීට් දාල වගේනෙ බොලේ...බොග වැඩ කරන්නෙම නෑනෙ..බෙහෙත් ගන්ට වත් වෙයිද මන්ද..ෂෙහ්..මටමයිනෙ වෙන්නෙ..Why me? oh god why me?

      Delete
    2. For your last question. Eat 2 big apples before you go to bed. Sure fire method.

      Delete
    3. අඩෝ පිං රවියා මේ.. කන්න තනන්න එපා හරිය.. ග්ර්‍..ර්..

      Delete
  2. ක්ලින්ට් ඊස්ට්වුඩ්ගෙ DVD සෙට් එකම ගෙදර තියෙනවා. මම සාමාන්‍යයෙන් ඕවා බලන්නේ movie marathon එකක් විදියට. ආයෙත් බලන්න ඕනේ වෙලාවක. මම මේ චිත්‍රපටිවල කැමතිම theme music වලට.

    ReplyDelete
  3. හෙක්.. හෙක්..
    කොහෙද බං ඔය වරාය තියෙන්නෙ. මට මතක නෑනෙ.

    ReplyDelete
  4. අර ක්‍රේසි විලීගෙ කතාව මං අහල තිබ්බෙ නෑනෙ බං. හිනා කාල පනගියා.

    ReplyDelete
  5. ක්‍රේසි විලීගේ කතාව නං මරු.....

    ඔය වතුර ටැංකිය වගේම තමයි අර සරුන්ගල් අරින්ඩ මත්තල හදපු එකත්.... මම එකසැරයක යනකොට පාරෙන් 75%ක් විතර වී වේලෙන්ඩ දාලා..... සරුන්ගල් අරින තැනත් වේලෙනවා..... එතැන බලන්ඩ රුපියල් 50 ටිකට් වලින් එන උන් විතරයි.....

    ReplyDelete
  6. රවීයියා මම නම් හිතන්නේ බන්දුලයාගේ කොල්ලා ඒහෙම හරි දේශපාලනික වශයෙන් සංවේදී වෙන එක හොඳයි.මොකද දැන් දැන් තරුණ පරපුර දේශපාලනය ගැන උනන්දුවක් දක්වන්නේ නැහැ කියලායි අර මැතිවරණ කොමසාරිස්තුමා කියලා තියෙන්නේ මොකද දැන් මේ විදියට ගිහින් නැතිනම් වෙන්නේ දේශපාලනය ගැන කිසිම උනන්දුවක් නැති අවිඥනික පිරිසක් බිහි වෙන එකයි.

    ReplyDelete
  7. වෙස්ටර්න් ඉගන ගත්තෙ මරදාන සෙකන්ඩ් හෑන්ඩ් කඩවලින් ගත්ත J.T. Edson පොත්වලින්, තුවක්කු, පිහි, සෑදල,කස, කාර්ඩ් ගේම්, තාක්ෂණිකව විස්තර කරනවා. සමහර ගන් ෆයිට් පිටු ගාණක් යනවා රිවෝල්වර්වල විස්තර හා ඉතිහාසයත් එක්ක. රවි කියෙව්වෙ නැද්ද? The Floating outfit - Dusty Fog, Mark Counter, The Ysabel Kid, Waco, Ole Devil Hardin, John Wesley Hardin, Doc Leroy


    Btw, "රවි වීරසිංහ අන්තර්ජාතික බ්ලොගය" කියල මේකෙ නම දේසමාමාක විදිහට වෙනස් කරමුද?

    ReplyDelete
  8. දැං කිරි අත්තේ මේ යන හැටියට හෙටානිද්දට හොඬවැල තියෙන පක්සෙ අයටත් ඔය විදිහටම නෙලන්න පොල්පිත්තක් කපාගන්න වෙයි නේද? ඒකට එකාතකින් තමුන්නැහැ වදවෙන්ට ඕනි නෑ. අර පොල්වත්තෙයා උගේ අකලංකාරේ ලියයි ඒ ගැන ජාතකයක් වෙනම.

    දැං එතකොට ඔය තොටුව බද්දට දීලා ගත්තු සල්ලි ටික තොටුව හදන්න ගත්තු ණයට හිලවු වෙනවද? නැත්තං එව්වෑං රටට වැඩදායී රථවාහන බුරුත්තක් ගේනවද?

    ReplyDelete
  9. ඔහෙලට ඉතින් 'හිජකුපාම-නීලකාස' අමතක කොරන්ට එපා එතුමාගේ 'ශ්‍රී රෝහණ ජනරංජන' ටයිටල් එකත්.
    (ජේ ආර් උන්නැහේ හිටිය නං කියාවි ශ්‍රී රොහාන් ජනරංජන කියල ඒක වෙනම කතාවක්)

    ReplyDelete
  10. සුපිරිම කතාවක්. හිජකුපාම නමත් මරේ මරු. ඇත්තටම හිජකුපාම කරා ඇළවල් දකින්න තරම් දුර බලන කෙනෙක් නෙමෙයි. නමුත් හිතුවක්කාර දඩිබිඩි ගතිය රටට ප්‍රතිලාභ අරන් දුන්න අවස්ථා තියනවා. යුද්දෙ වෙලාවෙ ජාත්‍යාන්තර ප්‍රජාව මොකක් කියයිද ඉන්දියාව ඇමරිකාව මොනව හිතයිද පිටසක්වල ජීවීන් මොනව කරයිද නොකිය එවෙල කරන්න තිබ්බ වැඩේ කලා.

    ආර්ථික පැත්තෙන් නම් හිජකුපාම ෆේල්.
    ඇත්තටම ආර්ථිකය ගත්තොත් හිජකුපාම හිතන්නෙ ඔය කාරනා හතර විතරමයි.

    ReplyDelete
  11. රනිල්ගේ වහලාගේ සිතුවිලි මතු වෙලා තියෙන්නේ, බැඳුම්කරේ ගැන සද්දේ නැතිව මරාගේ මුව හමට තඩිබානවා.බලන් ගියාම බයියන්ට අන්තයිනේ රනිල්ගේ වහල්ලු !!!!!

    ReplyDelete
  12. ඔක්කොම බුල්ස් අයි!!!!.. ක්‍රේසි ඕයි..:)))

    ReplyDelete

මගේ සිතුවිලි ගැන ඔබේ සිතුවිලි

LinkWithin

Related Posts Plugin for WordPress, Blogger...